Eviny gjer tiltak for å unngå skadeflaum

– Vasskraftverka våre har gått for fullt i fleire dagar, og vi har også gjort andre tiltak for å laga plass til meir vatn i magasina. I tillegg har vi utsett vedlikehald av kraftverk for å kunna produsera så mykje som mogleg i samband med uvêret, seier Sonja Chirico Indrebø, administrerande direktør i Eviny Fornybar.

Ho fortel at vertskommunane for kraftanlegga blir varsla, slik at dei er budde på å handtera situasjonen.

Historisk store tilsig

Samla er det venta i overkant av 200 millimeter nedbør dei neste tre dagane. Nedbøren starta måndag kveld og avtar noko midt på dagen tysdag, før den aukar på igjen tysdag kveld. Torsdag vil nedbøren gradvis gå nordover og minka i styrke. Nedbøren vil starta som snø i høgare strøk, men skal raskt gå over til regn også der. Kombinasjon av regn og snøsmelting bidrar til store tilsig også høgt til fjells.

– I historikken vår ser vi ingen liknande hendingar vinterstid som har gitt så mykje tilsig som vi ser i prognosane for dei komande dagane. Tiltaka våre gjer at vi har kontroll på situasjonen, men det vil vera overløp i enkelte vassdrag, og derfor større vassføring i elvane enn normalt på denne tida av året. Vi ber om at alle tar omsyn og unngår å ferdast der det er mykje vatn, seier Sonja.

Regulerte vassdrag dempar flaum

Regulerte vassdrag har ein fordel når det gjeld demping av flaumar. Eviny Fornybar kan bruka magasina som buffer og dermed redusera flaumtoppane samanlikna med situasjonen i uregulerte vassdrag.

Eviny Fornybar har sett gul beredskap som følge av situasjonen.